Rusiye quvetçileri Qırımnıñ eki sakinini tuttı, olar Ukrayñna telükesizlik hızmetine Rusiye arbiy obyektleri ve tehnikasınıñ fotoresim ve videolarını bergen. Bunı RİA Novosti Rusiye devlet agentligi bildire.
"RF FSB-sı Qırım cumhuriyetinde Ukrayina mahsus hızmetleri menfaatlarında kritik infrastruktura ve arbiy tehnika obyektleriniñ foto ve video qaydını yapqan 1977 ve 1993 senesi doğma eki Rusiye vatandaşınıñ qanunsız faaliyetini toqtattı", — dep aytıla haberde.
Rusiye mahsus hızmetleriniñ malümatına köre, yaqalanğanlar Telegram vastasınen celp etildi. Devlet hainligi maddesine istinaden cinaiy dava açıldı.
"RİA Novosti" neşiri tutulğanlarnıñ izaatları ile videolarnı derc ete. Amma Qırım.Aqiqat muarririyeti, bu itiraflar basqı altında alınğan bile dep tüşüne. Tutulğanlarnıñ adları ve soyadları Rusiye kütleviy haber vastalarında derc etilmey.
"KrımSOS" uquq qoruyıcı teşkilâtınıñ malümatına köre, 2024 senesi eñ azından 56 Qırım sakini Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diverssiya teşkil etüv ya da zorbalıqqa çağıruvlar şeklinde qabaatlavlar qullanıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
