Rusiye tarafından mahküm etilgen qırımtatar cemaat jurnalisti Amet Suleymanovnıñ daima yüksek basımı ve bedeninde tökme bar. Bunı onıñ apayı Lilâ Lumanova bildire.
"Ametten çoqtan berli haber yoq edi: ne mektüpler, ne telefon etmeler. Elbette, onıñ alı, hususan sağlığı, bizni pek qasevetlendire. Bir ande dayanılmaz derecede ağır oldı, tek bir fikir bar edi: ⁇ ketmek kerek. İlk yaz ayınıñ 22-nde Vladimir şeerine yolğa çıqtım", — dep yazdı Lilâ Lumanova.
Qadın 2000 kilometrlik yolnı keçip, ilk yaz ayınıñ 24-nde saba koloniyağa keldi ve qısqa müddetli körüşüvge ariza yazdı.
"Saat ekide meni içeri aldılar. Eki qatlı camdan onıñ şaşma közlerini kördim, közlerindeki sevinçini... er vaqıt olğanı kibi, Amet özüni tuttı. Biz eki buçuq saat laf ettik. Onıñ sağlığı, ilâcları, bulunğan şaraitleri aqqında laf ettik. Uzun bir körüşüv imkânı aqqında da laf ettik", — dep bildirdi Suleymanovnıñ qadını.
Suleymanovnıñ aytqanına köre, onıñ daima yüksek basımı ve tiş problemleri bar, belli olmağan sebeplerden ara-sıra bedeninde tökme de peyda ola. Oña yapılması kerek olğan yürek ameliyatına kelgende ise, iç bir haber yoq.
"Ertesi künü müessiseniñ yolbaşçısına bardım. Ameliyat aqqında laf ettik — Ametniñ yürek klapanını deñiştirmek kerek. Añlayım: böyle şaraitlerde bu qıyın ve uzun bir esnastır. Amma men tırışmağa kerek edim", — dedi qadın.
2021 senesi Rusiye mahkemesi Amet Suleymanovnı "Qırım musulmanları davası" boyunca 12 yılğa mahküm etti. Üç yıl devamında sağlıq vaziyeti sebebinden ev apsinde edi.
Jurnalist arterial ve mitral yürek yetersizligini çeke. 2023 senesi çeçek ayınıñ 6-nda Amet Suleymanovnı apiske alıp, izolâtorğa alıp kettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
